Մադրիդի «Ռեալի» գլխավոր մարզիչ Կարլո Անչելոտին Լա Լիգայում «Ռեալ Վալյադոլիդի» նկատմամբ տոնած ջախջախիչ հաղթանակից հետո (6-0) պատասխանել է իր ապագայի մասին հարցին։
Ավելի վաղ ԶԼՄ-ները հայտնում էին, որ իտալացի մասնագետը մրցաշրջանի ավարտից հետո կլքի ակումբը։ Նրա կարիերայի ամենահավանական շարունակությունը Բրազիլիայի հավաքականն է։
«Կարծում եմ, որ այսօր մրցաշրջանի վերջին հատվածն ենք սկսում, և դա նման է նախորդ տարվան: Սկզբում մենք վատ հանդես եկանք, բայց մեր հարձակվողները շատ արդյունավետ և ուժեղ էին։Երեկ ես բոլորին հասկացրեցի, որ առաջիկա երկու ամիսների ընթացքում չեմ խոսելու իմ ապագայի մասին։ Իմ պայմանագրի ժամկետը լրանում է 2024 թվականին, և ես նախատեսում եմ այն հասցնել մինչև վերջ։ Եթե դրանից հետո «Ռեալը» գոհ կլինի ինձնից… լավ, ապա կմնամ մինչև 2034 թվականը»,- Անչելոտիի խոսքերն է մեջբերում Marca-ն։
